Tärkeä ilmotus ylheisölle (Viktigt meddelande till allmänheten, VMA), oon sen takia ette kätevästi huomioittea ihmisiä ette jotaki vakavaa oon tapahtunnu. VMA:haan kuulu usseita eri tapoja ette ilmottaa varotuksen, yks niistä oon varotusilmotus SE-Alert joka tullee suohraan sinun mupihliin.
Tärkeä ilmotus ylheisölle, VMA, käytethään ette varottaa ihmisiä vakavissa onnettomuuksissa, kriisissä, sotavaarassa ja soassa.
Sinua saatethaan varottaa erilä laila:
- Ulkovarotus jotako kuttuthaan Hesa Fredrik.
- Ilmotus raation, tv:n, sms:in, internetin ja apitten kautta.
- Ilmotus suohraan sinun mupilitelefoohniin SE-Alert:in kautta.
Ko yks VMA lähätethään ulos sie piät aina lukea sen varsin ja seurata ohjeita. Se saattaa olla ette jääjä sisäle, välttää yhtä aluhetta ja mistä sie saatat saaja lissää informasuunia.
Käynissäoleva VMA näkkyy Krisinformation.se niinku punasenna huomautusknappina alkusivun yläosassaa. Jos punasta huomautusknappia ei näy niin käynissäolevaa VMA:ta ei ole olemassa.
Lissää informasuunia VMA:sta ruottiksi.
SE-Alert – tärkeä ilmotus suohraan mupihliin
SE-Alert oon yksi tapa ette lähättää ulos VMA, suohraan mupilitelefoohniin. Kaikin, joilako oon smaartti mupilitelefooni, saattavat saaja varotushälytyksen joka oon ilmotus, kova äänisingnaali ja tärinä. Sie saat sen vaikka mupili oon äänettömässä tilantheessa. Siiheen ei vaai appia elikkä rekistreerinkiä.
Sen mitä sie tarttet oon:
- ette sulla oon smaartti mupilitelefooni joka oon päivitetty
- ette sie olet liitetty mupiliverkosthoon
- ette sie olet sillä aluheela jossako oon tapahtuma.
Kysymyksiä ja vastauksia SE-Alert:istä
-
Milläs kielelä SE-Alert:in informasuuni oon?
Ko SE-Alert lanseerathaan kesälä 2026 ilmotus tullee olheen ruottiksi. Jälemin 2026 vuen aikana mupilitelefoonit, jokka oon laitettu muile kielile, tulevat saahmaan ilmotuksen englantinkielelä.
-
Kunkas se tapahtuu?
- Pelastuspalvelu, Polisi elikkä muut virastot niinku esimerkiksi Trafikivirasto (Trafikverket) vaativat VMA ottamalla yhtheyttä SOS-Alarm:in kansa. Yhessä Ruottin Raation kansa (Sveriges Radio) ilmotus formyleerathaan ja lähätethään ulos.
- Jos SE-Alert valikoitethaan kanalinna sinun smaartti mupilitelefooni elikkä smaarttikello tuntevat jos sie olet aluheela jossako oon tapahtuma.
- Mupilitelefooni antaa kovan varotuslarmin 10 sekuntia, tärisee ja sie saat teksti-ilmotuksen jossako oon informasuunia mitä oon tapahtunnu ja mitä sie piät tehhä. Seuraa ohjeita.
-
Koskas VMA lähätethään ulos?
Tärkeä ilmotus ylheisölle, VMA, käytethään ko jotaki vakavaa oon tapahtunnu joka varsin uhkaa elämää, terhveyttä, omasuutta elikkä miljöötä.
Esimerkiksi jos oon:- onnettomuuksia ja vakavia tapahtumia, esimerkiksi kaasupäästöä elikkä tulipaloa jossako oon myrkylistä sauta.
- vaikeita häiriöitä yhtheiskuntatoimissa, esimerkiksi raatioaktiivitten aihneitten laskeuma elikkä ongelmia ette päästä hätänumehroon 112
- kriisihantteerausta ennen ja ekstraortinääritten tapahtumitten yhtheyksissä, esimerkiksi jos tammi oon havereeranu elikkä juomavesielatus oon saputeerattu.
-
Saattavatkos alaikäset saaja SE-Alert?
Joo, kaikki mupilitelefoonit aluheela jossako oon tapahtuma saavat SE-Alert heän mupilitelefoohniin. Praati mielelhääns sinun lapsen kansa mikä VMA oon, miltä se kuuluttaa, minkä näkönen se oon ja kunka sitä pittää akerata. Tärkeintä oon ette pysyä rauhalisenna, lukea ilmotuksen ja seurata ohjeita.
-
Kunkas mie tehen jos mulla ei ole smaarttia mupilitelefoonia?
SE-Alert oon komplementti niile tavoile joitako oon olemassa ette lähättää ulos VMA, se ei korvaa olemassaolevia kanalia. Sie saatat vieläki ottaa ossaa VMA:sta niinku ennen – esimerkiksi raation, TV:n, apitten ja muitten kanalitten kautta.
-
Toimiikos se kaikissa mupilitelefoonissa?
Ette saaja VMA, SE-Alert:in kautta:
- sulla pittää olla kompatiipeli, smaartti mupilitelefooni päivitetty viimisellä ohjelmatavaralla
- sie piät olla liitetty mupiliverkosthoon
- sie piät olla sillä aluheela jotako VMA koskee.
Seuraavat mupilitelefoonit oon kompatiipelit:
- iPhone joka oon Apple-versuuni 11 elikkä uuempi
- Mupili jossako oon Android Google versuuni 12 elikkä uuempi. Kansa Android GO versuuni 13 elikkä uuempi.
-
Halvaaks auttaa muita käsittämhään SE-Alerttia?
Jos sie uskot ette jollaki sinun läheisyyessä, jollako oon smaartti mupilitelefooni elikkä smaarttikello, saattaa olla vaikea käsittää informasuunia elikkä kokea varotushälytystä uutena ja pölättävännä – praati mielelhääns sen henkilön kansa etukätheen. Sie saatat käyttää meän informasuuniplaavia joka selvittää helpomalla laila mikä SE-Alert oon ja kunka sinun mupilitelefooni tullee reakeeraahmaan.